Lathalain | Ang Tinaguriang Treynor-gard ng PCHS: Tatang Sammy Ikaw Na!

ANG TINAGURIANG TREYNOR-GARD NG PCHS: Tatang Sammy Ikaw Na!

§  ni: Elaine C. Delos Reyes – Patnugot sa Lathalain

Tila wala nga sa edad ang ka-astigan. Ito ang napatunayan ni Samson Musa sa kaniyang pagiging treynor ng Lawn Tennis at pagiging gwardiya.

Sa edad na 65 patuloy pa ring hinahasa ni Tatang Sammy ang mga kabataan ng Pitogo Community High School sa isports na Lawn Tennis. Sa mahigit isang dekada niyang pagiging gwardiya sa paaralan pinagsasabay niya ang pagbabantay sa paaralan at pagtuturo ng sa mga bata.

Ayon sa kaniya masaya siyang turuan ang mga batang Pitoguhin bukod sa hilig din niya ang paglalaro ng tennis nasisiyahan siya kapag nakikita niyang natututo at nananalo ang kaniyang mga tinuturuan. “sapamamagitan ng pagtuturo ko sa kanila ng lawn para na ring inilalayo ko siya sa kapahamakan katulad ng mga bisyo na natututuhan ng mga kabataan ngayon.” Paliwanag niya.

Walong taong gulang pa lamang si Sammy nang mahilig siya sa lawn tennis. Nagsimula siya sa pagiging ‘pulot boy’ o tagasimot ng bola ng isports. Edad siyam na taon, noong siya ay nasa ikaapat na baitang ay naging manlalaro na siya nito.  Ngunit natigil ito nang siya ay mahinto sa pag-aaral dahil sa pagkamatay ng kaniyang ama.

Sa murang edad naranasan na niya ang magbanat ng buto. Naging mangingisda siya sa loob ng 25 taon. Dahil sa kaniyang kasipagan tatlo sa kaniyang anim na mga anak na ang nakapagtapos ng pag-aaral.

Sa paglipas ng panahon tila kapatid niya ang paglalaro ng lawn tennis. Naging gwardiya siya sa paaralang Pitogo Community High School at doon niya ginamit ang kaniyang galing sa kinahiligang isports. “Mabait at matiyagang magturo si tatang Sammy” wika ni Bianca, isa sa mga tinuturuan niya.

Katulad ng pagpalo ng bola, hindi alam kung saan pupunta ngunit kukunin pa rin hanggang kaya. Ang edad nga ay isa lamang numero, bagamat ang pagtulong ay hanggang dulo.

Astig ka talaga Tatang Sammy!#