TUNAY NA PAG-IBIG
Tunay pala ang tagpo sa mga pelikula
Humihinto ang mundo at ikaw lang ang nakikita
Dahan-dahang kumikilos, maging pilantik ng mga mata
Sa mapang-akit na labi, bumubusal ang pagsinta.
Tunay pala ang kuwento sa mga libro
Ikaw ang aking prinsesa, ang prinsipe mo'y ako
Hawak ko ang kamay mo habang tayo'y tumatakbo
Patungo sa ligayang dulot ng pag-ibig mo.
Tunay pala ang persona sa isinulat kong tula
Ang laman ng aking puso ay laman din ng tugma
Sa simula ng pagsulat at lapat ng bawat salita
Ang puso ko'y humihiyaw, labis ang tuwa.
Tunay rin pala himig sa isang kanta
Wala ka nang magagawa kapag puso ang puminta
Sa bawat liriko yaring pag-ibig ko sinta
Sa'yo namang pagtono may dulot na harmonya
Tunay na ang pangarap sa panaginip ko
Magkasama sa habang-buhay ikaw lamang at ako
Walang sasayanging oras o maging minuto
Ibubuhos sa'yo lahat ang buong pag-ibig ko.
Mar Z. Holanda
Setyembre 14, 2023
Tula para kay Aira Jane Gloria
