TALAMBUHAY | SI ESTRELLA Z. HOLANDA

 Ang Talambuhay ni Estrella Zamora Holanda

isinulat ni Mar Z. Holanda (Pebrero 14, 2022)

Ipinanganak si Estrella Formigones Zamora sa Brgy. Masaya Pitogo, Quezon noong Diyembre 18, 1963,  kina Gng. Leonisa Formigones at Pablo Zamora.

Bata pa lamang siya ay mulat na siya sa kahirap, dahil walang hanapbuhay ang kaniyang nanay noon at tanging pagpapanday at pagtatanim ang pinagkakakitaan ng kaniyang ama.

Dahil sa kakapusan, si Estrella ay nakaranas ng pagtatrabaho sa murang edad upang matulungan ang kaniyang mga magulang at may maibigay na pagkain sa kaniyang mga kapatid.

Pangalawa sa panganay si Estrella. Ang kaniyang mga kapatid ay sina Esperanza, ang panganay, Faustino, ang pangatlo, Si Violeta, pang-apat at si Pablito ang bunso.

Liban kina Esperanza at Faustino na nakapag-aral hanggang sekundarya dahil sa pagtira sa ibang tao noon, ay wala na sa kanila ang nakapagtapos. Samantala may sampu pa silang kapatid sa mga naunang pamilya ng kanilang mga magulang. Limang unang anak ng kaniyang ina sa unang asawa, at lima rin sa kanilang ama. Kaya sa kabuoan ay labinlima silang lahat na magkakapatid.

1980, edad labing-anim, ikinasal at napangasawa ni Estrella si Crisostomo Villaflor Holanda, na kapwa taga Pitogo. Biniyayaan sila ng siyam na anak, anim na lalaki at tatlong babae, Sina Harold na nakatira ngayon sa Calauag, Quezon, may sariling sinasakang lupa ng kaniyang Beyanan , may pamilya at dalawang anak, si Crisostomo Jr. na nagtatrabaho sa Reina Mercedes Fishing Company sa Lucena City ngunit nasa Brgy. Cabulihan Pitogo, Quezon ang kaniyang napangasawa at 2 anak, si Lazaro na nasa Construction sa Mulanay Quezon, kasama ang kaniyang pamilya at 3 anak , si Rowena na nasa Bikol, Albay, may-bahay ng kaniyang asawa at 8 mga anak,si Paul Heart na driver sa Reina Mercedes Fishing Company, Lucena, City kasama ang kaniyang asawa at 1 anak, si Mary Jane na nasa Brgy. Biga Pitogo Quezon, may-bahay ng kaniyang asawa at 3 anak, si Carmina na nasa Bulacan, may-bahay ng kaniyang asawa at 3 anak, si Mar, isang guro sa pampublikong paaralan dito sa bayan ng Pitogo at si Christopher isang mag-aaral sa kolehiyo.

Noon Oktubre 29, 1999 sumakabilang-buhay ang kaniyang asawa at naiwan sa kaniya ang mga musmos na mga anak. Kaya binuhay niya itong mag-isa hanggang sa magkaroon ng sarili-sarili nitong mga buhay at pamilya.

Sa kasalukuyan, nananatiling nakatira si Estrella sa bayan ng Pitogo, Brgy. Masaya kasama ang dalawa niyang bunsong anak at isang apo. 

Larawan kasama ng siyam na anak:

Larawan kasama ang siyam na anak ang mga pamilya:

BASAHIN DIN: Estrella: Ang Star ng Buhay Ko

PANOORIN: Ang Natatanging Nanay

ESTRELLA: Ang Star ng Buhay Ko

ESTRELLA: Ang Star ng Buhay Ko
ni Mar Z. Holanda

Karaniwan ang tao kung humihiling para sa kaniyang pangarap, tumitingala sa langit at nagbubulalas sa mga bituin. Sa ganang akin, hindi ko na kailangan tumingin sa langit sapagkat ang bituing gabay ko sa aking pangarap ay nasa katauhan ng aking ina. Ang STAR ng aking buhay.

Ang nanay ko ay STAR ng aking buhay hindi dahil Estrella ang pangalan niya. Katulad ng paniniwala at inspirasyon ng isang tao sa kahilingan sa bituin sa langit para matupad ang kaniyang pangarap. Tila naging inspirasyon ko rin ang aking nanay para matupad ang aking mga pangarap.

Likas na mabait, masipag, mapagpakumbaba at mapagmahal sa pamilya ang aking nanay. Bata pa lamang siya mas pinili niyang isantabi ang kaniyang sariling kapakanan para makatulong sa magulang at may maipakain sa mga mas musmos niyang mga kapatid. Ang kaniyang mga magulang noon ay tanging pagpapanday lamang ang ikinabubuhay at kung minsang wala ay pangangaingin ang pinagkukunan ng makakain. Pangalawa siya sa limang magkakapatid. Hindi siya nakatapos ng pag-aaral ni wala sa kanilang magkakapatid dulot ng kahirapan na nagbunsod na sa kaniya upang maagang maghanapbuhay. Sa murang edad namasukan siya bilang kasamahin sa bahay at nagpapaupa sa mga may kaya upang may maiuwing pagkain sa mga malilit pang kapatid.

Edad labing-anim nakikilala niya at napangasawa ang aking tatay. Nabiyayaan sila ng siyam na anak, at ako ang pangwalo. Naging payak naman ang kanilang pamumuhay at magkatuwang na tinataguyod ang aming pamilya. Hanggang sa bago ipanganak ang aking bunsong kapatid ang aking ama ay biglang pumanaw. Sa pangyayaring ito hindi naging madali sa aking nanay. Lalo pa’t ilang araw nang mamatay ang aking ama – Oktubre 29, 1999 ay ipinanganak naman ang aking bunsong kapatid – Nobyembre 4, 1999. Tatlong taong gulang ako noon.

Sa edad na 36 mag-isang itinaguyod ng aking nanay ang maliliit na siyam na anak na iniwan ng aking ama. Iba’t ibang trabaho ang kaniyang ipinambuhay sa amin kahit na mga trabahong panlalaki. Nagpapaupa sa paglilinis ng bahay, namamalagwit o nagpapasan ng balde ng tubig at inirarasyon sa mga tahanan, tumatanggap ng mga labada, pangunguha ng mga lamang-dagat gaya ng sisi, tapalang, bagumon para may maipang-ulam at maibenta para pambili ng bigas. Lahat ng ito, lahat ng sakripisyo ng aking nanay ay aking nasaksihan sa aking paglaki.

Dahil dito, sa bawat kusot ni nanay ng damit sa mga tanggap na labada, bawat tapalang na nasisimot sa tabing dagat, bawat tapon ng tubig sa baldeng kaniyang pinapasan at mga alikabok na kaniyang nililinis ay nagsilbi kong inspirasyon upang balang araw ay maging agila akong lilipad sa langit at kasama ko siyang dadagitin mula sa pagkalugmok namin sa kahirapan.

Sa kasalukuyan ang pangarap na aking binuo mula sa sinag ng STAR ko sa buhay ay unti-unti ko nang natutupad. Ako ngayon ay isa nang guro sa pampublikong paaralan at unti-unti’y bumabawi sa aking nanay at sisikapin kong mapawi ang lahat ng kaniyang sakripisyo sa aming siyam na magkakapatid.

Kaya ngayon, kung may gusto man akong hilingin sa buhay, hindi ko na kailangan tumingin pa sa langit para sa aking pangarap dahil ang tunay na bituin ng aking buhay ay nasa katauhan ng aking nanay – Si Estrella, Ang Star ng Buhay Ko. 

BASAHIN DIN: Ang Talambuhay ni Estrella Z. Holanda
           PANOORIN: Ang Natatanging Nanay